На 27 Декември со почеток од 19 часот во големата сала на НУ Центар за култура „Кочо Рацин“ Кичево се одржа јубилеен концерт по повод 20 години од постоењето на КУД „Рацин“- Кичево.
Културно уметничкото друштво „Рацин“ при Центар за култура „Кочо Рацин“ Кичево славeше дваесет години јубилеј, години исполнети со игра, песна, музика и искрена љубов кон македонската традиција. Дваесет години во кои низ ова друштво поминаа многу генерации, оставајќи дел од себе во секој чекор, секое оро и секоја песна.
Културно-уметничкото друштво „Рацин“ го сочинуваат две значајни целини:
– Школата за народни танци и ора, и
– Школата за народни инструменти.
Во текот на изминатите две децении, КУД „Рацин“ се изгради како значаен чувар и промотор на македонската народна традиција, преку негување на изворната игра, песна и обичаи. Јубилејниот концерт претставуваше ретроспектива на богатиот фолклорен пат на друштвото, обединувајќи повеќе генерации играорци на една сцена.
Програмата беше збогатена со ора и кореографии од различни краеви на Македонија, изведени во автентични народни носии, што предизвика силни емоции и топол прием од публиката.
На концертот се доделија благодарници до сите поранешни и сегашни членови, кореографи, музичари, раководители, соработници и поддржувачи, кои со својата посветеност придонесоа за развојот и континуитетот на КУД „Рацин“.
Со одбележувањето на овој значаен јубилеј, КУД „Рацин“ продолжува со уште поголема мотивација да ја негува и пренесува македонската фолклорна традиција на идните генерации.
https://www.facebook.com/profile.php?id=100070950774337&sk=photos
