INQK “Koço Racin” – Kërçovë, për të pestin vit me radhë, mirëpriti Festivalin e Teatrove “UskanaFest”, i cili u mbajt nga 10 deri më 13 dhjetor 2025. Ky festival tashmë tradicional u shndërrua në një ngjarje të rëndësishme kulturore, duke e pozicionuar Kërçovën si një pikëtakim të artit skenik dhe krijimtarisë teatrore.
Gjatë katër ditëve të festivalit, publiku pati mundësinë të ndjekë një program të pasur me shfaqje teatrore për të rritur dhe për fëmijë, ku u prezantuan vepra të autorëve të njohur botërorë dhe bashkëkohorë, të realizuara nga trupa teatrore nga qytete të ndryshme.
Festivali u hap më 10 dhjetor 2025, në ora 19:00, me shfaqjen “Në Përballje me Vdekjen” nga Teatri i Tetovës, bazuar në veprat e August Strindberg dhe William Shakespeare, me regji të Afërdita Nuhijit.
Më 11 dhjetor 2025, në ora 19:00, u shfaq “Të Rresh apo të mos Rresh” nga Teatri Shqiptar i Shkupit, vepër e Anthony Neilson, nën regjinë e Shkumbin Istrefit.
Më 12 dhjetor 2025, në ora 12:00, u realizua shfaqja për fëmijë “Lojërat e Harruara” nga Teatri i Kumanovës, me autor dhe regji Ibër Deari, ndërsa po atë mbrëmje, në ora 19:00, publiku ndoqi shfaqjen “Gospodin Kolpert”, një produksion nga Qyteti i Kërçovës, nga autori David Gieselmann, me regji të Mihajlo Petrevskit.
Festivali u mbyll më 13 dhjetor 2025, në ora 19:00, me shfaqjen “Cilindri” nga Teatri i Gostivarit, vepër e Eduardo De Filippo, me regji të Afërdita Nuhijit.
Në kuadër të festivalit u nda edhe Çmimi për Shfaqjen më të Mirë, i cili iu akordua shfaqjes “Në Përballje me Vdekjen” nga Teatri i Tetovës, bazuar në veprat e August Strindberg dhe William Shakespeare, me regji të Afërdita Nuhijit, si vlerësim për realizimin artistik, interpretimin dhe konceptin regjisorial.
Edicioni i pestë i UskanaFest u realizua me mbështetjen e Ministrisë së Kulturës dhe Turizmit, Komunës së Kërçovës, si dhe me kontributin e Qendrës së Kulturës Kërçovë dhe shumë sponsorëve e partnerëve të tjerë, të cilët kontribuan në mbarëvajtjen dhe suksesin e festivalit.
INQK “Koço Racin” – Kërçovë falënderon të gjitha teatrot pjesëmarrëse, artistët, bashkëpunëtorët dhe publikun, të cilët me pjesëmarrjen dhe mbështetjen e tyre e bënë UskanaFest – Edicioni V një ngjarje të suksesshme dhe domethënëse kulturore.
Foto link :
https://www.facebook.com/share/p/1QPk1LMNPX
https://www.facebook.com/share/p/1BUpFaacLQ
https://www.facebook.com/share/p/1GQzQzioLK
